عايزين إيه من الحكومة يا تنابلة ...

مش عارف اقول اية ولا اعيد اية

احنا فعلا شعب ما يتمرش فية والحكومة باعت علينا حتى حلتها المخرومة والبالطو القديم المرقع واحنا ما فيش فايدة فينا ؟ أكل ومرعة وقلة صنعة ؟

اشتكينا من البطالة الحكومة بنت لينا قهاوى وغرز لغاية ما بقت ( وما الدنيا الا مقهى كبير ) وبقت غرزة لكل مواطن واحنا بردو لسانا زالف ما فيش فايدة ؟

اشتكينا من ازمة المساكن الحكومة بنت لينا مقابر فايف ستار وقالت لنا ( اعمل لآخرتك كأنك تموت غدا ) ( والآخرة خير وأبقى ) واحنا ما فيش فايدة عاوزين نكوش على الدنيا والآخرة ؟ ما شفتش طمع زى دة ؟

اشتكينا من ازمة المواصلات جابت لنا التوك توك يوصلنا لحد بيوتنا وانت ونصيبك بقى يا توصل سليم يا توصل ............ وبردو ما فيش فايدة قال اية ؟ التوك توك صغير عايزين حاجة اكبر من كدة ؟ شفت قنزحة اكتر من كدة فعلا احنا شعب اقرع ونزهى

اشتكينا من قلة العيش جابت لنا العيش الطباقى والعيش الابيض والاحمر والاخضر وعلى كل لون يا عيش ومش بس كدة اضافت الى العيش كل الاضافات التى من شأنها تزود الصحة وتطول العمر من صراصير لزوم البروتين ومسامير لزوم الحديد والزرنيخ واعقاب السجاير علشان تتكيف بعد الاكل .

لكن بردو ما فيش فايدة ال اية الواحد علشان يطول رغيف عيش يقف فى طوابير ايام وليالى ؟ عمركم شفتم دلع واستنطاع اكتر من كدة ؟ طيب يا فاشل منك لة ما الطوابير ليها فايدة بردو واوعوا تكونوا فاكرين الحكومة مش قاصداها لا قصداها ونص وتلت اربع ؟
الطوابير ليها سبع فوائد
دى رياضة يا نماردة يا تنابله الوقوف والدفع والخبط والزغد بتقوى العضلات وتجرى الدم ( على الرصيف طبعا ) وبعدين انتم وراكم الديوان يعنى اهوه الحكومة بتسليكم بدل ما انتم ملطعين على القهاوى والغرز وبعدين ليها فائدة اجتماعية مهمة جدا فانا اعرف ان هناك اربع حالات زواج حصلت فى طوابير العيش اتجوزوا وخلفوا والعيال قربت تروح المدرسة كمان .
شفتم الحكومة حلت مشكلة العنوسة ازاى ؟

وانا شايف ان طالما الشعب دة ما فيش منة فايدة وهايفضل كدة كل ما تديلة لقمة يطلب غموس تديلة غموس يطلب يحلى تديلة يحلى يطلب كباية شاى علشان يعمر الطاسة ...... الخ
انا شايف ان الحكومة تنفض لنا وتحلق لنا وتسيبنا نهاتى وتدور لها على عقد عمل فى دولة بترولية وتسيبنا نخبط فى بعض ونشوف مين بقى هايأكلنا ويسكننا ويجوزنا ويلعبنا رياضة

ويجعــــــــــــــله عامـــــــــــــر

مممممممممممم
مافيش ولا رد

انتو خايفين ولا ايه عايزين إيه من الحكومة يا تنابلة ... Icon_idea

ايه الموضوع الجامد ده

فعلا عايزين من الحكومه ايه

فعلا شعب متمرد وطماع اوى لا مش اوى بس ده طماع اوى جدا خالص

بس ربنا يستر

وحضرتك عارف طبعا من ايه وعلى مين

تسلم دماغك بجد

على رايك عاوزين ايه من الحكومه بعد كده

يعنى فى حكومه عملت مع شعبها ده وحلت مشاكلها

ربنا يطيل فى عمر الحكومه كمان وكمان

» محيى الدين: الإجراءات التي اتخذتها الحكومة مكنتها من تجاوز تداعيات الأزمة المالية