بلــدتنا بين الاسى والدمــوع

ايه بس ياناس اللى حصــل*** ليه حالنا لــكده وصـــــــل

اصبحــــنا بنـــاكل بعضــنا ***ولا عــــاد فى حد يلمنـــــا

الاخ بيــاكل لــحم اخـــــوه ***ومـفيش ابن بيطيع ابــوه

الكل فى بعضه بقى بيضرب ***والعم من دم ابن اخوه بيشرب

والام بقـت بتشوف الـويـل**** بعد مــا ربت وسهرت الليــل

دلوقتى ياعينى بتنام باكيه**** ودموعها على خدودها شاكيه

بقينا بنشوف ابن يتيــــم ****الناس بيعملـــوه زى البهيــم

لافيه لقمه ولا حتى هــدوم**** فيه ضرب وسب من غير لزوم

ايه بس ياناس اللى حصل*** ليه حالنــــــا لـــــكده وصـــــل

بصيت لحـــال كل واحــد*** ملقتشى فى تفكيره غير شئ واحد

كل همـه جمع فلــــــوس**** من كتر المــــــــال بقى ملحــوس

من اجل المال قتل نفوس ***وبحب الجــــــــاه بقى مهــــوس

بيشرب خمرة وبيزنى كمان*** من غــير خشه وفى اى مكـــــان

تقوله حــــرام يقلس عليك*** ولــو طــــولت يمســـك فيـــــك

ايه بس ياناس اللى حصــــــل*** ليه حالنا لكده وصـــــــل

بنشوف ناس بيصلو لربـــــنا*** وبعد الصلاة بيعصو ربنــا

بيشربو بــانجو فى الشـــارع*** فى البيوت وفى المـــزارع

تقوله يـــــــــاعم ارحم نفسك*** يقولك خليك انت فى نفسك

وابقى ادع لنـــا ياعــم الشيخ*** وكبر دمـــاغك وكل بطيـخ

متضحكشى!!دى والله الحقيقة*** بتحصل كل ساعة وكل دقيقة

احنا فى بلد اسمهـــا شرملـس ***الطيب فيهـــــا يبقى مـفلس

فيهــــا ابن بيضرب ابــــــوه ****وفيهــــا اخ بيقتل اخــــــوه

فيهــــــا الشاب بيموت نفسه ****من كتر الذل اللى شايفه وحاسه
بيروح يرمى نفسه وسط بحار*** مش عارف اخرته جنه ولا نـار

ايه بس ياناس اللى حصل*** ليه حالنا لكده وصــــــــل

كان زمان فيه ناس طيبين ***بيحبو الخير لكل المسلمين

دلوقتى الحقد مالى القلوب ***والحشيش بقى مالى الجيوب

الابن بقى بيعزم على ابوه ***والاب بقى بيعزم على اخوه

منك لله يـــــااطاليــــــــا ****موتى شباب فى قلوبنا غاليه

رزق هنا رزق هنــــــاك ***ماهو رب هنا هو رب هنـــاك

ياريت نعرف بقى الحقيقة*** ونبص لحالنــتا ولــو لدقيقة

دقيقة تغير مصير حياتنــا*** وتخليـنا نعـوض اللى فاتنــا

شوفو كـم واحد شيعنـــاه ***وكم واحدعلى اكتافنا شلنــاه

نسيتم يوم ماجوم الارباعة*** ودفناهم فى نفس الساعة

الكل يومهــــــا كان بيعيط ***والنسوان عمــاله تسوط

والاطفال قــــامت مفزوعة*** والافراح كانت ممنوعـته

فى يومها كله قال البحر ممنوع*** حتى ولو هنموت من الجــــوع

فى يومهـــا ناس كانت بتركب ***من نفس المكان ونفس المركب

قلت لنفسى ياالف خســـــــــاره*** على شباب حتتنا وشباب الحاره

ايه بس ياناس اللى حصـــل ****ليه حالنــــا لكده وصــــل

شفت صاحب بيخون صاحبه**** سايب نفسه لشيطان ساحبه

بيعشق اخته وماشى معاها**** ليل ونهار مقضيها ويــاهـــا

النهاردة بتخون صـــاحبك**** بكره الدور جـــاى على اختك

يضحك ويقــــول مـــــاليش اخـــوات*** ابويا مفيش فى خلفته بنات

ضحكت وقلت!النهارده بتخون صاحبك*** بكره الدور جاى على امــك

ليـــه غــــــاووين تزيف حقـــــــــايق*** وبنزعل من الحق ونضايق

ان عارف ان الحاله ضنك ****ومفيش رصيد فى البنك

عاوز بس شوية قنــــاعة**** ومنخليش السفر شماعه

ياما شفنـــا منه الـــويل**** صـبـح وضهر وليـــــــــل

فيــه ابن اتيتم بسببه**** وفى اب شتمـــه وسبـــه

فيه ام مبتنامشى الليل ***وفيه اب بسببه امسى عليل

ربك بيرزق فى كل مكان*** فى شرملس وفى اليونان

هوبرده اللى فى اطاليـــا ***وهناك كمان فى المانيـــا

بيدى المســلم والكــــافر ***المحسن منهم والفـــاجـر

ياريت بقى تكون عرفت*** عشان انا زهقت منك وقرفت

كلمـــته اخير هقولهــالك ****فتـــح عينيك وخـد بـــالك

الموت بيجى فى اى مكان**** فى اى حته واى زمـــــان

ياما شفنا ابن مات قبل ابوه*** كانو قبل شويه فى ابوه بيعزوه

رجعــــوا تانى عزوا ابـــوه*** بعد مــــــا غسلوه ودفنـــــــوه

وامه وقفت تبكى على بــابه ***حزينه على عمره وشبــــــابه

بتقول يــــارب خدنى بداله ***وخلــــيه لزوجته وعيـــاله

باالملايين كان ويـــــــــاه**** مخدشى حاجه منها مـعــاه

غير حتة قطن وشوية دبلان*** لفوه فيها وحطوه للديدان

ايه بس ياناس اللى حصل*** ليه حالنا لكده وصــــل

كان فيه ناس معاها ملايين*** بقو دلوقتى جعـــانيين

بعد ما كانوا بيلبسو الصوف*** بيدارو دلوقتى من الكسوف

واللى كــــانو بيكبرو عليهم**** دلوقتى بيمدولهم ايـــديهم

بلــدتنا بين الاسى والدمــوع Get-8-2009-Giantup_CoM_fc6blzfc

د.السيد الخولى

كتبت هذه الكلمات عندما هبت علينا رياح اطاليا العاتيه والتى راح جراء توابعها كثير من فلذات اكبادنا ولما رايت فى بلدتنا من انتشار الرذيله والمباهاه باالمعصيه وعلى صوت المال فوق كل الاصوات وتاه وسط كل هذا شباب يسير بلا عقل ولا وعى كل همه هو الهروب من جحيم الاحساس بالنقص الى
جحيم اخر يجهله لربما يكون اعتى واشد واعذرونى ان قسوت فى بعض الاحيان على اهلى واحبابى فعلى قدر المحبة ياتى العتاب ..ودمتم على الخير والسداد

بلــدتنا بين الاسى والدمــوع Get-8-2009-Giantup_CoM_grelfjzr

[/b][/b]

21

يااااااااااه انت بجد شاعر جامد اوى اوى اوى
عندك حق فى كل كلمه بتكتبها واسلوبك فوق الرائع
بجد القصيده عجبتنى جدا
تسلم الايادى
ياريت كل الناس تقرا اللى انت كتبته ده
بس للاسف حتى لو قرأوه هيرجعو ينسو ويفكرو فى السفر والفلوس تانى
منتظرين المزيد

بلــدتنا بين الاسى والدمــوع Get-8-2009-Giantup_CoM_clmpuvap

بجد تسلم على المشاعر الجميله دى
بس يادكتور الكلام سهل والاحساس كمان بالحصره والندامه كل ده بييجى سهل من اقل موقف جارح
لكن لقمة العيش والحياه اللى مفهاش ذل هى دى اللى ما بتجيش بالساهل
انا مش مقتنعه بالكلام اللى انا بقوله ده لانى نفسى الحياه تكون ابسط من كده بكتير
بس للاسف هو ده الواقع
لكن طبعا دا مايديش الحق لشبابنا فى حاجات كتير غلط بيعملوها ومعاصى كتير بيقعوا فيها
ربنا يهدينا جميعا
وعلى فكره حضرتك شاعر رائع

زائر

بجد بجد فوق الروعة ومعاك فى كل كلمة قولتها بس لو جى امامى سكة سفر يادكتور بس بطريق شرعى ومباشر مش فى البحار هسافر لان مهما خدت هنا مش هيكفى يادكتور انا صحيح شقتى جاهزه وكل حاجة بس المرتب مهما كان مش هايكفى بس زى ماقلتلك عن طريق مباشر مش بحار

طبعا مش هاعلق على شعرك يادكتور الكلام الجميل والمتقن ده انا اقل من انى اعلق عليه
تسلم ايدك ودماغك انت بجد لميت كل عيوب البلد فى كلامك فوق الرائع
واللى بنتمنى اننا نتجنبها ودى مسئوليه كل فرد فى البلد
معقوله مافيش اى مزايا فى البلد اكيد فيه ياريت تحاول تبرزهالنا يادكتور ولو فى بيتين صغيرين
انا عارف انك هاتتعب اوى على ماتلاقى يمكن لان المزايا اتحولت لعيوب
فعلا النعمه اتحولت لنقمه
عالعموم ربنا يوفق الجميع ويهدينا كلنا يارب

مشكور على موضوعك يادكتور سيد ربنا يوفقك فى حياتك العلميه والعمليه
اكيد انت ميزه من مزايا البلد......................

بلــدتنا بين الاسى والدمــوع Mnwa9

شعرك بقدر ماكان قاسيا وصريحا الا انه كان الي القلب نافذا
ولعلي التمس العذر فهم شباب الي الرزق ساعون
ولرفع مستوي معيشتهم طامحون
ولعل قلة الفرص هي التي دفعتهم الي ان يسلكوا الدروب الصعبة
لكني لا ابرر ان يلقوا بأنفسهم الي التهلكة
ولعلكم تستشعرون تناقضا في كلامي
فالتمسوا لي العذر ايضا فلا أجد سبيلا الا ان التمس العذر وانتقد في نفس الوقت
فتلك مشكلة يتعذر حلها
فاللهم وسع ارزاقهم فكم اتمني ان يتم تضييق الفجوات في المستوي المادي بين ابناء قريتي
والله المستعان وهو خير موزع للارزاق

بصراحه احساسك هايل جدا انا عاجزه عن اى كلمه او تقدير بس الناس غميت عنيها وشافو الصح غلط والغلط صح واكبر صح هو السفر وماحدش بيفكر غير فى المال
ماحدش بيفكر فى الشاب اللى رايح والله واعلم هايرجع على فين
ولو عدى وربنا نجاه يوم مابيرجع لازم بمرض بس مين يسمع ويفهم
ربنا يوفقك يادكتور اتمنى لك المزيد