ابليس زهق مننا

على باب سفارة امريكا ..لمحت ابليس و ف ايده استماره ..بقول له على فين ؟ ..


قاللي بص ..يا هجره يا اعاره ..يا عم زهقت كفرت ..


الاقيش معاك سيجاره ؟ ..
انا انتهيت خلاص ...لا نافع وسواس ولا خناس ..ولا ليا عيش وسط الناس دي عالم مجرمين ..


عندكوا فائض ف الفساد ..في كل البلاد ..ومش محتاجين شياطين ..


مليش عيش ف البلد دي ....بقالي سنين عاطل ...و انتوا بتعرفوا ...تقلبوا الحق باطل ..


و تسلكوا القاتل ..و تمشوا ف جنازة المقتول ..ومفيش مشاكل ..


يا عم ده انا بقيت أوسوس بالمقلوب ...


و أقول للحرامي كفايه بقى توب ..انت هاتعمل كل الذنوب لوحدك ...


و أنا ابليس أشتغل واعظ ..ولا كمساري ف اتوبيس ..

يا عم ده انا زمان ..كنت استنى حد ينسى يسمي ..وهو بياكل لقمته ..دلوقتي كل اكلكم ملوث ..


و بصراحه الواحد خايف على صحته ...

ده مفيش ضمير اساسا ..عشان اموته ..و كل واحد بمزاجه ..خربانه ذمته ...

يا عم ده كل حاجه اتسرقت ..وكده الاجيال الجديده ..م الحراميه اتظلمت ..

يا راجل ده من كتر ما لطشت معايا ..

خرجت ف مظاهره ..مع الناس اللي بتقول كفايه ...

و برضه مفيش فايده



لما إبليس يقول كدة ويهاجر ... أحنا كمصريين نقول أيه ولا نعمل ايه ؟

ههههههههههههههه
ههههه

ههههههههههههههههههههههه
تحفه يادكتور وكل كلمه فيه حقيقه
بس نعمل ايه الدنيا حالها اتشقلب

نقول حسبنا الله ونعم الوكيل و والله ان شياطين لهم اشد واعظم علينا من ابليس

هههههههههههه
شكرا ليك يادكتور بجد جميلة

حلوووووووووه

المصريين لهم ربنا

اشكركم جميعا على مروركم وتعليقاتكم الجميله